Montenegro.com u posjeti Judy Ferguson, pozatoj američkoj spisateljici iz Fairbanks, Alaska.

Judy Ferguson i Gordan Stojovic u Beogradu 10 Aprila 2005. Početkom prošlog vijeka u rijekama ljudi koji za vrijeme velikih zlatnih groznica u potrazi za snovima o blagostanju i bogatstvu odlaziše na Aljasku našao se i veliki broj Crnogoraca. Bilo ih je iz svih krajeva Crne Gore. Uglavnom se radilo o ljudima koji su već neko vrijeme boravili i radili u drugim djelovima SAD koji primamljeni pričama o velikim mogućnostima za zaradu u surovim predjelima Aljaske krenuše na sjever. Mnogi pioniri iz Crne Gore u bespućima nekadašnje „ ruske amerike“ ostaviše svoje kosti ili bez traga nestadoše zauvjek. Nego od njih uspješe da pronađu ono za čim su krenuli u potragu, postadoše bogati i vratiše se najčešće u toplije krajve Amerike, drugi opet postadoše slavni i uspješni građani Aljaske i ostaše tu gdje i danas žive njihovi sinovi, unuci, praunici... Svakako među mnoštvom naših dosaljenika valja izdvojiti porodice Hajduković, Stijepović, Dapčević i naravno sve druge imena čijih članova se ističu među najuglednijim i najzaslužnijim ljudima u ovom dijelu svijeta. Slavni pionir John Hajduković, guverner Mike Stijepović itd. Kao i mnoge druge i ovu veoma važnu stranicu povijesti našeg naroda nekim čudom zaboravismo. Nebriga, nepostojanje adekvatnih institucija i još mnogo toga. Srećom veliki trud, uspjeh i muka njihova iako od nas samih skoro potpuno zaboravljena fascinirali su neke druge vrijedne i pametne ljude koji uradiše ono što je dužnost svakoga od nas kojima je i malo stalo do očuvanja korijena, tradicije. Američka spisateljica Judy Ferguson iz Fairbanksa, Alaska u svojem djelu „Parallel Destinies“ sačuvala je od zaborava sve tekovine, sve ono što za sobom ostaviše hrabri i pametni crnogorski pioniri u ovim krajevima svijeta i ne samo oni nego i njihovi potomci, one generacije američkih Crnogoraca koje i danas žive u tom djelu ove velike zemlje.

„Paralel Destinies“ naslovna strana knjige. Već dugi niz godina se divimo Judy-nom radu i komuniciramo sa njom. Naučismo mnogo toga od ove fantastične žene koja nam je svaki put iako prepuna obaveza nesebično izašla u susret. Nedavno me je obavjestila o svom dolasku u Beograd i u Crnu Goru. Bio sam jako srećan zbog činjenice da ću uskoro imati priliku da se sretnem i užiuvo popričam sa njom. Iako smo planirali da se vidimo tek nakon što dođe u Crnu Goru igrom slučaja zadesih se u Beogradu i tako se 10 Aprila napokon sretosmo i na balkonu jedne prelijepe dedinjske vile započesmo razgovor. Satima i satima samo slušah nevjerovatne priče, o njenom životu, radu, o Crnogorcima, familijama o njenoj inspiraciji. Slušah priče o uspjesima i padovima mnogih slavnih ljudi iz naših krajeva. O njenim iskustvima, željama i očekivanjima. Svakako udarismo temelje nečemu što će zasigurno dodatno prosvjetiti naša saznanja i učiniti da se ove dvije toliko udaljene zemlje, Crna Gora i Aljaska koje povezuju dvije veoma važne stvari, tekovine naših doseljenika i sličnosti u prirodnim ljepotama približe preko već postojećeg, neizbrisivog mosta ljudskog pregalaštva. I ja lično a i Montenegro.com ćemo uraditi sve što bude u našoj moći da Judy –na djela budu što je prije moguće prevedena i objavljena u Crnoj Gori. Da budu dostupna svakome tko želi da zna, kako, kad, zašto i koji to sve bijahu. U međuvremenu nastavljamo druženje i suradnju, čineći sve što možemo da vrijedni i hrabri nikada više ne odu u zaborav. Gordan Stojovic Montenegro.com